Hripui thihpui 1,000 chuang awm leh

India ramah Nilaini khan Covid-19 hri kai thar 48,786 awm lehin, ni thum chhung hri vanga thi 1,000 tling lo an awm hnuah Nilaini khan mi 1,005 in an thihpui leh.

Ni 23 chhung chu ni khatah hri kai thar hmuh chhuah hi nuai khat hnuai lam a ni tawh a, March 18 hnu lama hri kai hmuh chhuah zat tlem ni ber chu June 29 kha niin, hemi ni hian hri kai thar mi 37,566 an awm.

June 30-a hripui vanga thi mi 817 kha April 10 hnua ni khata Covid-19 vanga thi an tlem ber ni a ni. Mahse ni thum chhung thihpui hi 1,000 tling lo an awm hnuah an rawn pung chho leh ta a ni. Mahse ni 13 chhung chu a zawnin hri vanga thi hi 2,000 hnuai lam a ni tawh thung.

India hi US dawtah coronavirus hri kai vaibelchhe thum awm tlinna ram hmasa ber a ni a, hri leng thawh hnihna a thlen hnuah ni 50 chhung lekin hri kai thar vaibelchhe khat hmuh chhuah an ni hman a ni.

All India Institute of Medical Sciences (AIIMS) director Dr Randeep Guleria chuan Covid-19 hri chi hran hmuh chhuah thar leh, Delta Plus variant chu kai a awlsam zualin thihpui pawh an tam zawk nia sawi chu finfiahna a awm lo tih a sawi. Delta Plus hi India hri leng thawh thihna thlen natna chhan nia sawi, Delta variant inthlak danglam leh a ni.