PM-in vaccine semchhuak chak turin ngen
Prime minister Narendra Modi hoa council of ministers ṭhukhawm chuan ramchhunga vaccination programme kalpui mek an thlir let.
Meeting hi darkar li chhung zet neiin, PM Modi hian hri leng thawh hnihna vanga chhiatna thleng leh hri leng thawh thumna lo thleng thei laka inven dan tur te an sawiho a ni. Niti Aayog member VK Paul chuan ramchhunga vaccine semchhuah kalpui dante a sawilang bawk.
Virtual meeting neih hma hian PM chuan transport, telecom leh civil aviation ministry-te hmalak dante ennawnin senior minister-te chu meeting a lo neihpui tawh bawk.
India Covid-19 task force chief VK Paul chuan ramchhunga Covid hri leng mek dinhmun leh vaccine semchhuah chungchanga an hmalaknate a tarlang a, Modi pawhin ram chhunga hripui leng mekah fimkhur taka awm reng a pawimawh thute a sawi ve bawk. Modi hian hri leng thawh thumna pumpelh theihnan ram mipui hnenah chak zawka vaccine semchhuah kawnga ṭan la turin a ngen a, minister-te chu hri darh tur khuahkhirhna tura theihtawp chhuah chunga sorkar hmalakna te ngai pawimawh turin a chah.
Minister-te hnenah hian mipuiten Covid inkaihhruaina an zawmṭhat leh ṭhat lohte ngaihven reng tur te, vaccine la duh lo an awm loh nana hma la turin leh vaccine semchhuah rang taka kalpui ṭhin turin Modi chuan a hrilh a ni.
Ram puma hri leng thawh hnihna na tak thleng chungchangah sorkar hmalakna hian sawisel a hlawh fo. Mahse heng sawiselna leh an hmalakna duh khawp lohna awm ṭhinte pawh an ngaihven reng tih sawiin, hri venna atana pawimawh vaccine semchhuah chu chak taka kalpuiin, kumin December thlaah mipui tling chu vaccine pek hman vek a tum a ni.