India-ah Covid-19 vanga thi nuai 4 an chuang : Hripui vanga thi nuai 4 tlinna ram pathumna a ni

India ramah Ningani khan Covid-19 hri vangin mi 853 an thih belh leh a, ram pumah he hri vanga thi hi mi 4,00,312 an awm tawh a ni.

US leh Brazil dawtah India ram chu Covid-19 hri thihpui mi nuai li awm tlinna ram a ni ve leh a ni.

Mexico ramah chuan hripui vanga thi nuai hnih chuang an awm a, hri thihpui mi nuai khat chuang awmna hi ram 10 a awm bawk.

US chu hri kai tamna leh thihpui tamna ber ram a la ni chhunzawm zel. US-ah hian Covid-19 hri thihpui hi nuai ruk an tling tawh a, Brazil (nuai 5.2), India (nuai 4) , Mexico (nuai 2.3) leh Peru (nuai 1.9) te'n an dawt. Russia, UK, Italy, France leh Colombia ramte chu hri vanga thi tam zualna ram zingah an tel bawk a ni.

Hripui thihpui tamna ram zingah India ram chu mipui cheng aṭanga chhutin thi tlemna a la ni thung. Mi maktaduai khatah mi 287 chu hri vanga thi anga chhut a ni a, Russia-ah chuan thihpui zat hi maktaduai khatah 916 niin; France, Mexico, US leh UK-ah chuan 1000 - 2000 inkar an ni thung. Peru chu a ratio sang berin, mi maktaduai khatah mi 5,765-in an thihpui anga chhut a ni. Colombia, Italy leh Brazil ramah-ah pawh maktaduai khat zela thi zat chu 2,000 chuang an tling. Hetih lai hian India rama hri kai hmuhchhuah zingah za zelah 1.3-in an thihpui a, ramdang nena khaihkhinin thihpui rate hi a hniam hle.

Ningania hri kai thar hmuh chhuah chu 46,617 niin hemi ni vek hian hri kai enkawl dam 59,384 an awm bawk. Ni 50 chhung chu hri kai thar aiin enkawl dam hi an tam zel tawh a ni.

Hri kai hmuh chhuah thar zat pawh a tlahniam zel a, ni 25 chhung chu positivity rate hi 5% hnuai lam a ni tawh. Hri kai mek, active case pawh a hniam chak hle a, nimin khan active case hi 1.67% a ni. Ram pum huapa recovery rate chu 97% chuang a ni tawh.

Kerala, Maharashtra leh Tamil Nadu-te chu hri kai thar tam zualna niin, Kerala-ah hian Ningani-a hri kai hmuh chhuah thar chu 12,868 an ni a, Maharashtra-ah 9,195 leh Tamil Nadu-ah 4,481 an awm bawk. Delhi boruak chu a ziaawm chho zel a, hri kai hmuh chhuah thar pawh 91 niin, an positivity rate hi 0.12%-ah a tla thla tawh a ni.