Hri kai pun tamna state 6-ah central team tir

Sorkar laipui chuan ram chhungah Covid-19 hri kai pun tamna state paruk - Kerala, Arunachal Pradesh, Tripura, Odisha, Chhattisgarh leh Manipur-ah nimin khan high-level multi disciplinary public health team paruk a tir.

Central team-te hian hri kai pun dan leh, hri darh tur venna kawnga harsatna an tawh dante hi zirchiangin, state sorkar hmalak mekna tihchak dante an ngaihtuah pui dawn tih union health ministry chuan a sawi.

Team tinah hian member pahnih zel awmin, clinician leh public health expert-te an ni.

Health ministry chuan team tinte hian an kalna state ṭheuha inkaihhruaina kalpui dante enpuiin, test, surveillance leh containment operation neih dante, Covid appropriate behaviour kenkawh a nih dante, hospital khum awm zat te, ambulance, ventilator, medical oxygen awm zatte an enfiah dawn a, hei bakah hian Covid vaccine pek hna kalpui dan pawh an en nghal dawn a ni, a ti.

Sorkar laipui hian a hma pawhin hri leng hluarna state-ah an dinhmun enpui tur leh, hri dona kawnga chak zawka hma lak pui dan ngaihtuah pui turin central team hi an a lo tir fo tawh a ni.