Uttarakhand CM thar lalut

Uttarkhand chief minister thar atan nimin tlai khan BJP MLA Pushkar Singh Dhami chu rinawmna thu tiam tira lakluh a ni.

Pushkar Singh Dhami hi Uttarakhand chief minister 11-na a ni a, thla li chhunga CM pathumna a ni bawk.

Tirat Singh Rawat chu Zirtawpni liam ta khan Uttarakhand Chief Minister a nihna atangin a bang a, Inrinni khan rorellai BJP legislature party chuan CM thar atan Khatima bial MLA, Pushkar Singh Dhami chu ruat nghalin nimin tlai khan lakluh a ni ta a ni.

Kum 45 mi, Dhami hi union defense minister Rajnath singh nena inpawh tha tak nia sawi a ni. CM hlui Bhagat singh Koshiyari hnuaiah khan officer on special duty a ni thin.

CM kalchhuak, Tirath Singh Rawas hi March thla khan chief minister atan lakluh a ni a, assembly member a nih loh avangin September 10 hmaa MLA atana thlan tlin a ngai a ni. Mahse hri leng vangin by-election buatsaih mai theih a ni dawn lo a, hei vang hian central lama an party hruaitute nena an sawiho hnuah a bang ta a ni.

Rawas-a'n CM dinhmun ni 114 a chelh chhung hian an party lam atanga sawiselna a tawk fo a, hruaitu hmasate policy a sawisel fo avangin a chungah an lawm lo hle. Covid-19 hri kai hluar chhoh laia Kumbh Mela a buaipui dan te, RT-PCR test a tul loh thu a sawite chuan sawisel a tawk nasa hle.