India ramah hri kai thar 43,071 awm belh leh

India ramah Inrinni khan Covid-19 kai thar 43,071 an awm a, hri vanga thi 955 an awm bawk.

Hri kai mek chu nuai 4.85 in a tlahniam tawh a, ni 97 hnuah nuai 5 hnuailamah a tla thla thei ta a ni. Hri kai mek hi hri kai hmuh chhuah tawh aṭanga 1.59% an ni.

Inrinnia hri kai dama chhuahtir chu 52,299 niin, hri kai dampui tawh hi vaibelchhe 2.96 an tling tawh. Hri kai thar aiin dama chhuahtir chu a zawnin ni 52 an tam tawh zawk bawk.

Hri kai dam tawh, recovery rate chu 97.09% ah pung chhoin, nitin test neih aṭanga hri kai 2.34% awmin, ni 27 chhung 5% hnuailamah a awm tawh. World Health Organisation (WHO) chuan Covid positivity rate 5% hnuailama awm te chu ram him, safe zone ah a puang.

Inrinni vek khan ram pumah vaccine dose nuai 63.87 semchhhuah a ni leh a, hemi nen hian ramchhungah vaccine dose vaibelchhe 35.12 semchhuah a ni tawh tih health ministry chuan a sawi.

Sorkar laipui chuan Zirtawpni khan nu naupai laite'n CoWIN platform-a inziaklutin vaccination centre hnai berah Covid-19 vaccine an la thei dawn tih a tarlang.

Bharat Biotech-in Covaxin clinical trial phase thum an neih hnuah an vaccine hian symptomatic Covid-19 lakah 77.8% in a veng thei tih an sawi. Delta variant inkaichhawn awlsam tak lakah 65.2% in a veng thei tih an sawi bawka, mahse data hi ennawn leh tura tih a ni.

India-ah Covid-19 kai thar an tlahniam zel laia state 12-a Delta Plus variant hmuhchhuah thar awm leh chuan health official te lu a tihai thar leh hle. Delta strain-te hi sorkar laipui chuan thla hmasa khan "variant of concern"-ah dahin state tinte chu inbuatsaihna ṭha nei turin a ngen.

Covid appropriate behaviour zawm ṭhat a nih loh chuan hri leng thawh thumna hian October-November inkar hian a vanglai thleng chho leh turin an ring a, mahse hri kai thar hi thawh hnihna ai chuan a letin an tlem tawh thung dawn tih sorkarin Covid-19 zir chiang tura an rawih panel chuan a sawi.