Maha-ah Dalit-ten nawrh huaihawt

Maharashtra-a Pune district-a Dalit hnam laka tharum thawhna duh lohna lantirin nimin khan Dalit hnam chuan state chhung khawpui hrang hrangah nawrh an huaihawt.

Tunkar tir lama British-Peshwa indo champha vawi 200-an hriatrengna hun hmannaah, Bhima Koregoan leh a chhehvel thingtlang khuaah right-wing Hindu organisation leh Dalit pawl inkarah buaina a chhuak a, buaina chhuakah hian mi pakhat a thi a ni. Dalit hnamte chuan Dalit mite laka tharum thawhna thleng dang zo loah Maharashtra Chief Minister Devendra Fadnavis-a kaihhruai BJP sorkar chu an puh a ni.

Dalit hnamte chuan lungawi lohna lantirin nimin zing khan Thane rel station-ah rel kawng an dang a, mahse security force-ten lo dangin a hnuah rel service pawh a pangngai angin kalpui leh a ni. Goregaon-a rel kawng pawn dan an tum bawk.

Mumbai-ah chuan school leh college te hawn vek ni mah se venthawn thilah school bus te erawh chu tlantir an ni lo. Chembur-ah private school bus chu nawrh huaihawtten lungin an tawng a, hliam an awm lo nia hriat a ni. Taxi-auto rickshaw union-te chuan nawrh hi an thlawp a, mahse rel leh BEST (Bombay Electric Supply And Transport) bus service-te erawh chu dan pangngaia tlantir an ni.

Pune-ah pawh nawrh huaihawt vang hian buaina a chhuah palh venthawn thilah school tam zawk chu khar an ni. School hotute chuan chawlh puan ni lo mah se, attendance an la lo tih an sawi. Savitribai Phule Pune University chuan MCom examination neih tur pawh a sawn phah bawk.

Chief Minister Fadnavisa-a chuan Pune-a buaina chhuak chungchang chhuichiang tur hian Bombay High Court judge ṭanglai pakhat chu ruat a, mipuite chu inthunun turin a ngen bawk. Union Home Minister Rajnath Singh pawhin thil awmdan zawtchiangin CM Fadnavis-a hi a bia a ni.