Ram pathum tlawh turin Sushma Swaraj zin dawn

External Affairs Minister (EAM) Sushma Swaraj-i chu vawiin hian South East Asia ram pathum–Thailand, Indonesia leh Singapore tlawh turin a zin dawn.

Minister hian ni nga thangin ram pathumte hi a tlawh kual dawn a, India Act East Policy hnuaiah South East Asia ramte nena inlaichinna ṭha zawk siam dan kawng a buaipui dawn a ni.

MEA thuchhuah chuan minister hian January 4-5 chhungin Thailand a tlawh dawn a, a cham chhung hian Thailand foreign affairs minister Don Pramudwinai chu official meeting a neihpui dawn a, ani hian Swaraj-i pual hian zanriah a lo buatsaihsak dawn bawk niin a sawi.

Thailand-a awm lai hian Swaraj-i hian political, tdefence leh economic lama inzawmna nghet zawk neih dan te, ASEAN ram te nena India thawhdunna tihlen dan chungchangte a sawpui dawn bawk a ni.

January 5-6 ah Indonesia-ah kalin, Swaraj-i hian India-Indonesia Joint Commission 5th meeting chu Indonesia foreign minister Retno Marsui nen an kaihruai dawn a, a pual hian zanriah buatsaih a ni bawk ang. Minister pahnihte hian ASEAN-India Network of Think Tanks meeting vawi hnihna an hawng bawk ang.

Indonesia aṭang hian Singapore panin, January 7 ah Swaraj-i hian Regional Pravasi Bharatiya Divas (PBD) a hawng dawn a, he meeting thupui atan hian "Ancient Route, New Journey: Diaspora in the Dynamic ASEAN-India Partnership" tih hman ani. Singapore hotute meeting a neihpui bakah, ASEAN palaite a kawm dawn bawk a ni.