Lalu-a hremna puan hun tur sawn

Ran chaw man tihchingpen thubuaia thiam loh chantir, Bihar chief minister hlui leh Rashtriya Janata Dal (RJD) hotu Lalu Prasad leh midangte hremna pek tur puan hun chu vawiinah sawn a ni.

RJD hotu leh midang 14-te chu December 23 khan CBI special court chuan ran chaw man tihchingpen thubuaiah thiam loh a lo chantir tawh a, Lalu hi Jharkhand-a Birsa Munda central jail-ah dah a ni. Sum tihchingpenna a inhnamhnawiha puh, Bihar chief minister hlui dang Jagannath Mishra leh midang parukte erawh chu thiam chantir an ni thung.

Thiam loh chantir a nih chungchangah Lalu chuan dik lo taka a chunga ro rel a nih thu sawiin, Bihar pumpui pawhin an thlawp niin a sawi. Thudik chu a tawpah a la lang chhuak dawn a ni, a ti. Mi thiltithei zawkten amah chu an hrem niin a sawi a, heng mite hian khawtlang chu an ṭhendarh a, mi chuanhnuai zawkten an rorel dan an sawisel chuan an lo hrem mai zel a ni, a ti.

Kum 2013 October thla khan Lalu hi he thubuaiah vek hian thiam loh chantir a lo ni tawh a, thla hnih lung-inah a tan hnuin bail-in a chhuak a ni.

CBI chuan central-in Bihar tana ran chaw leina tur sum pek tam tham tak tihchingpen a nih hi Lalu-a chief minister laia thleng a ni tih a sawi a, he thila mawhphurtu ber chhuina tur a tikhawtlai niin an sawi. Lalu hian thil dik lo taka tih a nih thu hi hre mah se, thil ti dik lote hremna tura hma a lak loh avangin sum tihchingpen hi a thleng zawm zel niin CBI chuan a sawi bawk.