PM hlui Manmohan Singh-a laka thubuai thehluh ngaihtuah

Delhi Court chuan nimin khan prime minister hlui Manmohan Singh-a laka phatsantua puhna thubuai thehluh chu a ngaihtuah.

BJP hruaitu leh advocate Ajay Agrawal chuan PM hlui Manmohan Singh bakah Congress hruaitu hrem tawk mek Mani Shankar Aiyar leh party hruaitu ṭhenkhat dangte chu Pakistan nena Narendra Modi-a kaihhruai sorkar paihthlak a nih theihnana phiarruah a puh a, hei hian tun hnaia Gujarat assembly inthlan neih takah pawh nghawng a nei a ni, a ti.

Ajay Agrawal chuan Congress hruaitu, Manmohan Singh leh vice president hlui Hamid Ansari-te hoa an party hruaituten meeting an neih ṭumin Modi-a chungchangte ṭawngkam mawi lo taka sawi a ni , a ti bawk. A petition thehluhah chuan he meeting hi Delhi-a Aiyar-a chenna hmunah neih a ni a, Pakistan High Commissioner leh foreign minister hluite pawh an tel niin a sawi. Aiyar-a chenna ina Pakistan official-te lo thlen a, meeting lo neihpui chu ram himna atana pawh a hlauhthawnawm hle a ni, tiin a sawi.

Agrawal hian Lok Sabha inthlan hnuhnung berah Rael Bareli biala Sonia Gandhi khingtu a ni a, a chak zo lo a ni. Court-ah petition a thehluah hian Aiyar leh midang, meeting-naa telte chu ram phatsantua puhna thubuai siamsak turin a ngen a ni. Meeting an neih chungchang hi National Investigation Agency (NIA) leh Delhi Police-te hnenah pawh chhui chiang tura a ngen tawh thu leh, a hlawhtlin loh thu a sawi.