Taj Mahal tlawh thei zat bituk dawn

Agra-a hmun hmingthang, Taj Mahal tlawh thei zat chu ni khatah mi 40,000 chinah bithliah tum a ni.

Archeologicla Survey of India chuan Taj Mahal leh a chhehvel te uluk zawka enkawl a nih theihna turin ni khata khualzin tlawh phal zat bituk hi a tum a, hemi chungchang ngaihtuah hian Culture Secretary Ravindra Sigh chuan ASI official leh Agra district admistration aiawh bakah Central Industrial Security Force officer-te pawh meeting a neihpui tawh a ni.

Khualzin tlawh zat hi online leh offline-a ticket pekchhuah aṭangin chhiar a ni ang. ASI chuan kum 15 hnuailamte chu 'zero-value' ticket pekchhuah a tum a, hei hi tlawhtu zat chhinchhiahna atana tih a ni a, luh man erawh laksak an ni lo ang.

Tunah hian Taj Mahal tlawh thei zatah hian bithliah siam a ni lo a, report-a a landanin kum tinin tlawhtu hi 10% in an pung a ni. Nikhata khualzin tlawhtu 70,000 an awm chang pawh a awm a ni.