TN state transport-a thawkten nawrh huaihawt

Tamil Nadu sorkar hnuaia transport department employee union-in nimin khan an state pumah nawrh an huaihawt avangin public bus service a awm lo a, mipui­ten harsatna an tawk nasa hle.

Hnathawktute hian an hlawh 2.57% a tihsan phutin nawrh an huaihawt a ni. State transport minister MR Vijayabhasakar chuan sorkarin hlawh hi 2.44% a tihsan a remti a, mahse hei hi pawl ṭhenkhat chauhin an pawmpui niin a sawi. Hnathawkte hlawh tihsanna tura state sorkarin sum a sen belh tur hi cheng vaibelchhe 83 a tling a ni.

Sorkarin hlawh tihsanna tura rawtna a siamte an pawm loh avangin Ningani zan aṭang khan union worker-te chuan nawrh hi an huaihawt a ni.

Nawrh huaihawt vang hian sorkar hnuaiah transport service zawng zawng, Metropolitan Transport Corporation (MTC), TNSTC, SETC leh local town bus-te pawh an tlanchhuak lo niin TN State Transport Employee Federation president A Sundarrajan chuan a sawi.

Transport staff-te hi an hlawh a tlem hle a, kumin hian an hlawhbi hi ennawn leh tur a ni a, mahse sorkar nena an inbiakna a hlawhtling thei lo a ni.

Tamil Nadu Transport depart­ment hian thawktu 143,000 vel neiin, bus 22,000 a nei a ni. Nikum May thla khan thawktute hian an hlawh san phutin nawrh an lo huaihawt tawh bawk.