Loneitute'n nawrh thar thawh leh dawn Parliament session laiin kawng zawh an tum

Sorkar laipuiin farm law thar pathum a siam takte duh loa hun rei tak lungawi lohna lantir tawh, loneitute chuan an nawrh huaihawt chu thar thawh leh an tum a, Parliament monsoon session neih chhungin Delhi-ah kawng zawhin Parliament pawnah punkhawm an tum.

Samyukt Kisan Morcha (SKM) hruaitute chuan hemi chungchangah hian thuchhuah siamin, July 17-ah eptu party hrang hrangte hnenah lehkha thawnin, Parliament monsoon session chu loneitute an thlawpna lantirna atana hmang turin an ngen dawn tih an sawi.

SKM chuan session neih chhung chu rorel inkawm neih ni apiangin Parliament pawn lamah lungawi lohna hi an lantir dawn tih an sawi a ni.

Hemi hma hian SKM chuan July 8, zing dar 10 leh chhun dar 12 inkarah thil man sang, a bikin diesel leh eirawngbawlna gas man sang zel duh lohna lantirin ram pum huapin lungawi lohna lantir an tum thu an lo sawi tawh bawk.

Sorkar laipui chuan loneitu pawl aiawhte hi inremna siampui tumin ṭum 11 inbiakna a neihpui tawh a, mahse tun thlengin inremna an la siam thei lo. Loneitu lam hian farm law pathumte hi ṭhiah vek an phut a, hetihlai hian sorkar lam chuan ṭhiah loin, a ṭul dan anga siamṭhat a inhuam thu a sawi thung.

Parliament monsoon session hi July 19 aṭangi neih ṭan a ni dawn a, August 13 thleng a awh ang. Session chhungin Parliament in hnihte hian rorel ṭhutkhawm ṭum 19 ve ve an nei dawn a ni.

Lok Sabha member 444 leh Rajya Sabha member 218-te chuan Covid-19 vaccine dose kimin an la tawh a, MP ṭhenkhat erawh hri an kai avangin vaccine dose hnihna hi an la la thei lo.

Nikum March thlaa aṭanga hripui leng vangin Parliament session-te pawh a nghawng buai hle a, nikuma budget leh monsoon session neih pawh tihtawi a ni a, kumina budget session pawh tih tawi a ni bawk. Hi vang hian Parliament-ah hian bill 40 chuang leh ordinance panga tikhawtlai a ni mek a ni.