SC-in Baba Ramdev thusawi zirchiang dawn

Supreme Court chuan Yoga Guru Ramdev-a'n Covid-19 hri kai te enkawlna atana allopathy damdawi hman a sawisel chungchanga original record chu a zirchiang dawn.

Ramdev hian modern medicine, allopathy chu thil awmze nei lo niin a sawi a, hri kaite chu allopathic medine hmanga enkawl an nih vangin mi nuai telin an thihphah niin a sawi. A thusawi avang hian Indian Medical Association chuan Patna leh Raipur-ah Ramdev-a lakah hian FIR eng emaw zat an thehlut.

Indian Penal Code leh Disaster Management Act, 2005 provision hrang hrang hnuaiah thubuai hi siamsak a ni.

Ramdev chuan a thusawi avanga a laka thubuai thehluh chu titawp rih tur leh, Delhi-a transfer turin a lo ngen tawh a, hei hi chief justice N V Ramana, justices A S Bopanna leh Hrishikesh Roy-te awmna bench chuan nimin khan a ngaihtuah a ni. Bench chuan Ramdev aiawha inlan, senior advocate hnenah Ramdev-a thusawi dan dik tak chu an zawt a, a thubuai original record chu thehlut tel turin an ti bawk.

Indian Medical Association (IMA) chuan Ramdev hian Covid-19 hri kaite enkawlna atana allopathy damdawi chuan awmzia a nei lo tia a sawi avangin mi tam tak rilru a chawkbuai a, hri kai zingah pawh damdawi pangngaia enkawl duh lo an awm phah niin an sawi .

Ramdev-a'n Allopathy leh Ayurveda a khaikhin chungchang hi ram pumah sawizui a hlawh a, mahse union health minister Harsh Vardhan-a'n a thusawi hi thil awm lo tak a nih thu hrilha lehkha a thawn hnuah Ramdev hian May 23 khan a thusawi hi a sut leh a ni.