Kum 3 leh a chanve tang turin Lalu Prasad Yadav hrem

Bihar chief minister hlui, Rahstriya Janata Dal (RJD) hotu Lalu Prasad Yadav chuan sorkar laipui aṭanga ranchaw man tur sum pek tihchingpenna thubuaiah thiam loh chantir a nih hnuin, kar kalta Inrinni khan kum thum leh a chanve tang tura hrem a ni. Hei bakah hian cheng nuai nga chawi tura tih a ni bawk.

Inrinni khan Ranchi-a special CBI court chuan video conferencing hmangin Lalu-a hremna tur hi a puang a, hei hi ranchaw man tihchingpen thubuaia jail tang tura Lalu-a hrem a nih ṭum hnihna a ni. Court chuan Lalu hi cheng nuai nga chawi turin a ti bawk a, a sum chawi tur hi a pe lo a nih chuan a tan hun hi thlaruka pawhsei belh a ni ang.

Court chuan he thubuaia thiam loh chantir dang, mi pasarihte pawh hremna in ang tlang vek a pe a ni. Thiam loh chantir dangte chu Phool Chand, Mahesh Prasad, Bake Julious, Sunil Kumar, Sushil Kumar, Sudhir Kumar leh Raja Ram-te an ni.

Kum 2013 khan ranchaw man tihchingpen thubuaiah Lalu-a hi thiam loh chantirin kum nga tang tura hrem a lo ni tawh a, thubuai dang pathum a la nei a ni. 2013-a hrem a nih hian India rama MLA ṭang lai zingah anti-corruption law thar hnuaia thubuaia thiam loh chantir a nih avanga MLA aṭanga ban hmasa ber a ni. Nikum December 23 khan a thubuaiah hian thiam loh chantir leh niin, Inrinni khan hremna hi tihchhuah a ni ta a ni.

Hetih lai hian thubuai siamsak zinga mi, chief minister hlui Jagannath Mishra leh midang panga-te erawh chu thiam chantir an ni thung.

Lalu hian court-in a hremna tur a tihchhuah hma, kar kalta Zirtawpni khan a kum upat tawh vang leh a hriselna ṭhat tawk loh vangin a hremna tinep turin alo ngen tawh a, a ukil chuan Lalu hian zunthlum leh thisen sang a nei a, a hma lawk pawhin luhai avanga tlu ṭep niin a sawi.

Thiam loh chantir a nih hnuah Lalu hi Birsa Munda jail-ah dah nghal a ni a, he hmunah hian a tang chhunzawm dawn a ni. A tan chhung hian huan enkawltu hna a tawk ang a, ni khatah Rs 93 a hlawh ang.

Lalu-a fapa leh RJA hruaitu, Tejashwi Yadav chuan special CBI court thutlukna siam hi High Court-ah khin let an tum thu a sawi.

Bihar-a RJD thawhpui, Congress party chuan Lalu-a thiam loh chantir a nih avang hian party pahnihte thawhdunna chu a danglam phah dawn lo tih a sawi. Bihar Pradesh Congress Committee acting president Kaukab Qadri chuan Congress-RJD thawhdunna chu a la ngai reng dawn a, an state-a sakhaw zalenna leh rorelna dik a awm theih nan an bei zui zel dawn tih a sawi.