Maya-in Dalit-te venghim zo loah Maha sorkar a puh

Bahujan Samaj Party (BSP) hotu, Dalit hruaitu Mayawati chuan Maharashtra leh central-a BJP sorkar chu Pune chhunga Dalit hnam laka tharum thawhna thleng veng zo lo leh, chi inthliarna kalpuiah a puh.

Thuchhuah siamin Mayawati chuan, "Bhima-Koregaon-a Dalit mite chunga tharum thawhna thleng chungchanga, BSP-in Rajya Sabha-a sawiho a rawtna sorkarin a pawm duh lo chuan sorkar laipui leh Maharashtra sorkarin chi inthliarna a kalpui zia a lantir chiang hle a ni", a ti.

Maharashtra sorkar chuan a state chhunga Dalit hnamte venhimna a pe thei lo a, sorkar laipui pawhin he buaina chingfel tura a mawhphurhna a kengkawh zo lo a ni, a ti. BSP hruaitu chuan Dalit hnam chunga tharum thawhna thleng chungchanga BJP hruaitu pahnih laka FIR an thehluh pawh hma lak chhunzawmna a awm lo niin a sawi bawk. Maharashtra sorkar chuan thil sual titute chu hum a tum a ni, a ti.