Uttarakhand HC-in pawngsualtu thi tura hremna pek rawt

Uttarakhand High Court chuan state sorkar hnenah naupang kum tlinglo pawngsualtute thi tura hremna pek a nih theihna dan siam turin a rawt.

Justice Rajiv Sharma leh Alok Singh awmna division bench chuan kar kalta khan sorkarah rawtna hi thlenin, lower court-in kum 2016 June thlaa hmeichhe naupang kum riat mi pawngsuala that zuitu thi tura hremna a pek pawh a pawmpui bawk.

Bench chuan naupang chunga pawikhawihna a hluar chho hle tih sawiin, sorkarin pawikhawihtute hremna na zawk pek a nih theihna tur dan a siam a ngai a ni, a ti. Naupang kum 15 hnuai lam pawngsualtute chu tihhlum ngei an nih theihna dan siam turin a ti a ni. National Crime Record Bureau report in a tarlan danin, kum 2016 chhung khan Uttarakhand-ah hian naupang kum tlinglo chunga pawikhawihna thubuai hi 676 zet ziah luh a ni a, kum 2015 khan thubuai 635 leh 2014-ah 489 ziah luh a ni bawk.