LoC leh IB-ah civilian bunker 14,000 chuang siam dawn

Sorkar laipui chuan Pakistan sipaiten ramri kaltlanga India lam hawia silai an hmehpuah fo avangin, ramri-a cheng civil mite tan Line of Control (LoC) leh International Border (IB) ah civilian bunker 14,460 siam a remti a, hemi atan hian cheng vaibelchhe 415.73 a ruahman.

Official-te chuan ramri dungah hian individual bunker 1,309 leh community bunker 1,431 siam a ni dawn tih sawiin, hengte hi Jammu, Samba, Kathua, Poonch leh Rajouri sector-ah siam an ni ang. Individual bunker hi feet 160 biala siam a ni ang a, mi pariat thleng an awm thei dawn a ni. Community bunker hi feet 800 biala siam niin, mi 40 chin an awm thei dawn bawk a ni.

India leh Pakistan ramri hi km 3,323 a thui niin, heng zinga km 221-a thui hi International Border a ni a, km 740-a thui hi Jammu & Kashmir-a awm, LoC a ni.

Bunker 7,298 chu Poonch leh Rajouri district-a LoC-ah siam a ni ang a, Jammu, Kathua leh Samba district-a IB-ah underground bunker 7,162 siam a ni ang.

Nikum chhung khan ramri-a inkahhai puan palzuta Pakistan sipaiten India lama silai an hmehpuahah mi 35 an thi a, an zinga mi 12 chu civil mi anni.

BJP hruaitu leh MP Jugal Kishore Sharma chuan sorkar laipui ruahmanna siam chu lawmawma an tih thu sawiin, ramri bul khuaa chengte tan thil lawmawm tak a ni, a ti. Prime Minister Narendra Modi leh Union Home Minister Rajnath Singh-ten ramri bul khuaa cheng mipuite ngenna an tihhlawhtlin sak tur chu lawmawm a tih thu a sawi bawk.