Akhilesh-an mipuite bumah BJP sorkar a puh

Uttar Pradesh chief minister hlui leh Samajwadi Party hotu, Akhilesh Yadav chuan an state-a BJP sorkar chu mipuite bumah a puh a, sorkar chu hun khawhral mai mai loa central aṭanga thil lian tham tak dil turin a ti.

Akhilesh Yadav chuan SP chu national party-ah siam tumin a bei dawn tih a sawi a, an party tihchaknan a ṭul chuan 'rath yatra' pawh a neih tur thu a sawi.

Yadav chuan, "BJP sorkar hian mipuite hi a bum mai mai a ni. Mipuite buma hun khawral mai loin, party hian annual budget a siamah sorkar laipui aṭangin sum tam tham tak a dil zawk tur a ni", a ti.

SP hruaitu chuan tun hnaia ranchaw man tichingpena puha thiam loh chantir tak, RJD hotu Lalu Prasad Yadav chu a lainat thu sawiin, BJP chuan a chungah dik lo takin ro a relsak a ni, a ti. Lalu Prasad hi kum 21 kalta, Bihar chief minister a nih laia sorkar laipui aṭanga ranchaw man, cheng nuai 89.27 tihchingpen thubuaiah thiam loh chantirin, kum thum leh a chanve tang turin special CBI court chuan a hrem a ni.

SP national general secretary Ramashankar Vidyarthi pawhin Lalu chuan BJP a thawhpui duh loh vangin a tuar ta niin a sawi bawk. BJP-te phiarruknaah a awk a, BJP hi thawhpui duh ni se chuan jail tang tura hrem kher hi a nih a rin loh thu a sawi bawk.