Railways-in station 8,500 ah Wi-fi facility dah dawn

Indian Railways chuan ramchhunga rel station 8,500 ah Wi-fi facility dah a tum a, hemi atana hian cheng vaibelchhe 700 a ruahman a ni.

Railways hian sorkar laipuiin Digital India a siam kalpuina peng pakhat atan he ruahmanna hi a siam a, Wi-fi service hi station lian 216 ah chuan kalpui ni tawhin, free internet hi rel-a khualzin maktaduai sarih velten an hmang thei tawh a ni.

Railway ministry senior official chuan tunlai hunah hnathawhna atan internet chu a pawimawh tawh a, hei vang hian rel station tinah internet a thlawna hman a nih theih nan hma an la dawn tih a sawi.

Ministry in ruahmanna a siam dan chuan station 600-ah kumin March thla hian Wi-fi facility hi dah vek tum a ni a, station 8,500 ah hian kum 2019, March thlaah dah kim hman tum a ni. Heng zinga station 7,300 ah chuan rel-a khualzinte chauh ni lo, a bul vela thingtlang khuaten an hman theih tura ruahman tum a ni bawk.