A mite privacy tihchhiatsakah India sorkar puh

America sorkar thuruk puangzartu, Edward Snowden chuan reporter pakhat, Aadhaar data puanzar a nih chungchang report-tu thlavang hauhin, India sorkar chuan a mi leh sate thuruk tihchhiatsakah a puh.

Snowden chuan thil dik lo hailangtu, journalist hian chhuichian ni loin chawimawina dawn a phu zawk a ni, a ti. Sorkar chu he journalist laka thubuai siam lo a, data putruk chungchangah Unique Identification Authority of India (UIDAI) laka hremna lekkawh zawk turin a ti.

Sorkar chuan dik taka thiltih a duh a nih chuan a khua leh tui, mi tluklehdawngte privacy tihchhetu policy hi a siamṭhat a ngai a ni, tiin Snowden chuan a sawi.

The Tribune chanchinbu chuan Whatsapp-ah 'agent' inti pakhat chuan Rs 500 chauhin mi taupawh Aadhaar number a neihsak theih tur chu a sawi niin a tarlang a ni. UIDAI chuan Aadhaar cardholder-te nihna kimchang nei thei tura khawih chingpen theih dan a awm lo niin a sawi thung a, The Tribune report chu thu dik lo nia sawiin he chanchinbu lakah hian FIR a thehlut a ni.

Hemi chungchang hi eptu party hrang hrangte chuan sawiselin, journalist pawl pawhin FIR thehluh hi hnukdawk turin an ngen.

Sorkar laipui chuan press mite zalenna chu a ngaihpawimawh sak thu sawiin, newspaper pawh hi biain, an reporter chu data khawih chingpen theih nia sawi chungchang chhuichiang tura thawhpui a tum thu a sawi.

Snowden hian a hma pawhin India sorkarin Aadhaar database a siam chu khawih chingpen leh hmansual a hlauhawm thu a lo sawilang tawh a ni.