India ramah hri kai thar 34,703 awm : Thla 4 hnua hri kai tlem ber ṭum thleng

India ramah Thawhṭanni khan Covid-19 hri kai thar 34,703 an awm belh leh a, ni 111 hnua hri kai an tlem ber ṭum niin, hri leng thawh hnihna chuan zawi zawiin kian lam a pan niin a lang.

Hri kai dama chhuahtir, recovery rate pawh 97.17% a ni mek a, nitin test aṭanga hri kai thar hmuh chhuah, positivity rate chu 2.11% a ni bawk.

India-ah hripui len tirh aṭangin Covid-19 kai 3,06,19,932 an awm tawh a, mi 4,03,281-in an thihpui tawh bawk. Thawhṭanni khan Kerala-ah hri kai thar 8,037 hmuh belh niin, hmuhchhuah tam berna state a ni a, Maharashtra (6,740) in a dawt.

Hemi ni vek hian ram chhungah hri vanga thi 553 an awm a, thi zat pawh hi an tlahniam zel. Sample test aṭanga hri kai hmuhchhuah, daily positivity rate chu 2.11% ni mekin, ni 15 chhung 3% hnuai lamah an tla thla tawh a ni. Hri kai thar, daily new case aiin nitina dama chhuahtir, daily recovery chu a zawnin ni 54 chhung an tam tawh zawk.

Hri kai thar zinga 62% chu hmarchhak state aṭanga hmuhchhuah an ni. Hmarchhak state hrang hrangah hri kai hi an la tam chho zel a, official-te chu vawiin hian hmarchhak dinhmun hi an ngaihtuah ho dawn.

Delhi-ah chuan Thawhṭanni khan Covid-19 kai thar 54 chiah hmuhchhuah niin, nikum April 15 hnua a tlem ber ni a ni. Hri vanga thi pahnih awm lehin positivity rate chu 0.09% a ni mek tih Delhi health department data chuan a tarlang.

Maharashtra-ah Thawhṭanni vek khan hri kaihhnawih vanga thi 51 awm belh mah se March 15 hnua thi tlem ber ṭum a ni. Covid kai thar 6,740 awm belh lehin hri kai tawh zawng zawng hi 61,04,917 niin, hri vanga thi 1,23,136 an awm tawh tih health official te chuan an sawi.

Prime minister Narendra Modi chuan India ramin technology lama hma a sawn tawh zia lantirnan CoWIN kaltlangin vaccine hlawhtling takin a semchhuak thei a, ram zawng zawng hman theih tura peih thuai a ni dawn tih a sawi.

States, Union Territory leh private hospital-te hman turin Covid vaccine dose vaibelchhe hnih chuang a la awm tih Union Health Ministry chuan a sawi. Sorkar laipui chuan ramchhunga chak zawka vaccine semchhuah a nih theihnan theihtawp a chhuah chhunzawm zel tih a sawi.

Germany chuan Covid-19 Delta variant vanga UK, India leh ram dang pathum aṭanga khualzin luh a khapna chu vawiin aṭangin a hlip tawh dawn.