Maharashtra BJP MLA 12-te kum khat chhung suspend

Maharashtra-a BJP MLA 12-te chu Thawhṭannia Speaker-in-chair Bhaskar Jadhav laka mawi lo taka an chet avangin kum khat chhung suspend an ni.

Thawhṭanni khan Maharashtra legislative assembly session-ah OBC chungchang sawiho laiin eptu party, BJP-te hian Speaker-in-Chair Bhaskar Jadhav chuan thusawina hun a pe tam tawk lo nia sawiin an aubuai a ni. Rorel inkhawm tihtawp a nih hnuah BJP MLA-te hi Jadhav-a cabin-ah kalin, ṭawngkam mawi lo takin an ṭawngkhum bakah, ṭhenkhat chuan kut an thawh tel bawk. He thil thlen lai hian eptu hruaitu leh chief minister hlui Devendra Fadnavis pawh a awm niin Jadhav chuan a sawi.

BJP MLA-te chet dan mawi lo tak chungchang hi House-ah sawi khawmin, Maharshtra assembly aṭanga kum khat chhung suspend an nihna tur resolution pass nghal a ni.

Suspend order tihchhuah a nih hnuah BJP MLA-te hian Governor Bhagat Singh Koshyari hmuin, order hi dang turin an ngen a, Governor hian lo ngaihtuah a tiam a ni. BJP hian Bombay High Court-ah pawh thlen an tum nia sawi a ni. Nimin khan Assembly kawtah suspend an nih vanga lungawi lohna an lantir zui bawk.

Hetih lai hian constitutional expert-te chuan House rorelnaah Governor leh court-in inrawlh theihna an nei lo niin an sawi a, Constitution chuan Supreme Court thleng pawhin House chhunga rorelnaa an inrawlh a khap a ni, an ti.