BJP-in Jyotiraditya Scindia RS ticket an pe nghal
Madhya Pradesh Congress hruaitu hlun, an party chhuahsana Nilainia Bharatiya Janata Party (BJP) zawm ta Jyotiraditya Scindia chu BJP chuan Madhya Pradesh Rajya Sabha ticket a pe nghal.
Jyotiraditya Scindia hian kum 18 lai Congress tana a thawh hnuah Nilaini khan BJP president JP Nadda hmaah BJP hi a zawm a ni. Scindia hian MLA 22 a chhuahpui a, mahse heng MLA-te hian BJP an zawm ve dawn em tih erawh a la hriat loh thung.
BJP a zawm hnu hian Congress bei zuiin Scindia chuan MP mipuite hnena an thutiam hlen loah a party hlui chu a puh. Prime minister Narendra Modi leh union home minister Amit Shah-te chu mipui tana hnathawh theihna tur hmun an pek avangin lawmthu a hrilh bawk. Modi fak zuiin India ram hmalam chu Modi kuta awm a nih thu a sawi.
MP-ah hian Rajya Sabha seat pathum a ruak a, hemi hnawhkhat tur hian March 26 hian inthlanna an nei dawn. Tun dinhmunah hian chak turin vote 57 an hmuh a ngai. MP-ah hian assembly seat 230 a awm a, seat hnih ruakin member 228 an awm mek a ni. Mahse MLA 22-te banna hi pawm a nih chuan vote thlaktu turte annih bawk avangin inthlanna an neih turah hian nghawng a nei ngei ang.
BJP-in March 16-ah floor test hmachhawn tum
Madhya Pradesh BJP hruaitute chuan nimin khan Congress MLA 22 an ban avangin March 16 hian floor test hmachhawn neih an duh tih an sawi.
Thla 15-a upa Kamal Nath kaihhruai sorkarin buaina an hmachhawn mek chu remchangah lain BJP hian sorkarna an siam theihna turin floor test neih hi an beisei a ni. MP assembly BJP chief whip Narottam Mishra chuan, "Sorkar mek hian member an neih tlem zawk avangin Governor leh Assembly speaker hnenah March 16-a budget session ṭan hunah floor test neih kan dil dawn a ni," a ti.
MP Assembly dinhmun
• MP Assembly-ah hian member 228 an awm mek.
• Buaina an tawh hma khan Congress chuan member 114 an nei.
• Independent 4, BSP MLA 2 leh SP MLA pakhatin Congress hi an thlawp. Heng mi ṭhenkhat hian BJP an thlawp tawh zawk mai thei nia sawi a awm.
• MLA 22-te banna hi pawm a nih chuan Assembly-ah hian member 206 chiah an awm tawh dawn.
• Heng a chunga tarlante hi a thleng a nih chuan Congress hian member 92 chiah an nei tawh tihna. BJP-in 107 an nei thung anga, sorkarna siam turin member 104 chiah neih a ngai tawh bawk ang.