SC-ah CAA dodaltute thlalak tar chungchang ngaihtuah

Citizenship Amendment Act (CAA) dodaltute hming  leh thlalakte kawtthlera a tarchhuah, Allahabad High Court-in la bo turin thupek a tihchhuah chu Uttar Pradesh sorkar chuan Supreme Court-ah a khing let a, nimin khan ngaihtuah a ni. 

Supreme Court chuan Allahabad High Court thupek siam hi a lo dang duh lo a, Uttar Pradesh sorkar hnenah chuan eng dan tlawhchhanin nge CAA dodaltute thlalak leh hmingte chu mipui vantlang hmuh theih tura a tarchhuah tih a zawt let. 

Justice UU Lalit kaihhruai judge pathum awmna bench chuan mawi lo taka chet te, tharum thawhna leh buaina thleng zawnga chetna chu court-in a duh ngai lo tih a sawi a,  hemi rual hian thlalak leh hmingte kawtthlera tarlan a nih dawn chuan dan behchhan an nei tur a ni,  tiin, "He thilah chuan eng dan mah behchhan tur an nei lo,"  a ti. Hemi chungchang hi kar lehah ngaihtuah leh turin a dah a ni. 

Chief minister Yogi Adityanath thupek angin UP police-te chuan March 5 khan Lucknow khawpui chhung hmun hrang hrangah, nikum December thlaa CAA dodalna lantirnaa telte hming, thlalak leh address-te hi an tarchhuak a ni. Henga an tarchhuakte hi CAA dodalna lantirna buaina chhuaka sorkar thil tihchhiatte a man pe turin hriattir an ni bawk.