Covid-19 vangin sorkarin visa titawp lailawk

World Health Organization (WHO)-in Nilainia Covid-19 darh zel chu tunlai khawvela natna hri leng darh hnem ber a nih thu a puan hnuah, India sorkar chuan April 15 thleng atan visa pekchhuah a titawp lailawk.

Sorkar laipuiin visa a tihtawp lailawk hian diplomatic, official, UN/ international organisation, employment leh project visa bik thil erawh a huam lo thung ang. Sorkar hmalakna hi zanin tlai 5:30 aṭanga hman ṭan tur a ni. Overseas Citizenship of India (OCI) card neite zin phal an ni rih lo bawk a, ṭul bik avanga India a ramdang mi rawn zin ngaite chu India Mission-ah inhriattir tura tih an ni bawk.

Mamawh a nih huna hmang theih nghal mai turin State leh UT zawng zawngte chu anmahni bial ṭheuha 'Epidemic Diseases Act, 1897' puan in ring reng turin sorkar laipui chuan a hriattir. Sorkar laipui thuchhuakte hi Group of Ministers (GoM) ṭhukhawmina a rel a ni a, he meeting hi Health Minister Dr Harsh Vardhan chuan a kaihruai a ni. IMA-in Covid-19 chanchin thar mipuite hrilh hre zel lo turin sorkar a ngen Indian Medical Association (IMA) chuan sorkarin Covid 19 chanchinthar nitina awm a piang chu mipuite hrilh zel lo turin a ngen.

"WHO-in Covid 19 chu tunlai khawvela natna hri leng darh hnem ber a nih thu a puang avangin, India mipuite an thla bar a, an ral ṭi a ni. Hei vang hian Covid 19 nitina chanchinthar awm hi mipuite hriattir tlem a pawimawh a, chu vang chuan sorkar hian he hri leng chanchinthar hi mipui hriatah puangzar tlemse tih hi kan duh a ni," tiin IMA president Dr Rajan Sharma chuan a sawi.