J&K-ah sorkar laipuiin mi 451 la hren chhunzawm

Sorkar laipuiin nikum August aṭanga Jammu & Kashmir-a mi a hrente zinga mi 451-te chu tun thlengin chhuah an la ni lo. 

J&K-a mi a hren chhan hi nikum August 5-a special status pekna, Article 370  tihtawp sak an nih avanga buaina chhuak leh punlun tur venna atana a tih a ni. Mahse thla sarih vel sorkarin a hren hnuah, mi 451-te hi chhuah an la ni chuang lo a ni. 

Sorkarin a la hren zinga mi 396-te chu Public Safety Act (PSA) tlawhchhana hren an ni. Heng zingah hian J&K chief minister hlui Mehbooba Mufti, Omar Abdullah leh Farooq Abdullah-te pawh an la tel. Rajya Sabha ṭhutkhawmah Shiromani Akali Dal MP Sardar Sukhdev Singh Dhindsa chuan J&K-a sorkarin an mi hren chungchangah zawhna a zawt a, minister of state for home affairs G Kishan Reddy chuan he thil kaihhnawihah hian mi 7,357-te chu hren an nih thu a sawi a, CrPC hnuaia section 107 leh Jammu and Kashmir Public Safety Act, 1978 tlawhchhana hren an nih thu a sawi. Heng zinga mi 451-te chu hren chhunzawm a la nih thu a 

sawi bawk.    

Sorkarin mi tam tak a la hren chhunzawm reng hian sawisel pawh a hlawh hle a, mimal dikna rapbetah sorkar chu puh a ni.