ISRO-in satellite 100-na kapchhuak

Indian Space Research Organisation (ISRO) chuan nimin zing khan hlawhtling takin satellite 100-na, Cartosat (earth observation satellite) a kapchhuak a, hemi rual hian satellite dang 30 a kapchhuak tel bawk.

ISRO hi kumina satellite a kahchhuahna hmasa ber a ni a, nikum August thla IRNSS-IH satellite kahchhuah tum a hlawhchham hnuah a kahchhuah lehna hmasa ber a ni bawk.

Satellite-te hi Satish Dhawan Space Centre (SDSC) SHAR, Sriharikota-a First Launch Pad (FLP) aṭanga kahchhuah an ni. Satellite kahchhuahte hi India siam Microsatellite pakhat leh Nanosatellite pakhat bakah, ram paruk Canada, Finland, France, Republic of Korea, UK leh USA siam Microasatellite pathum leh Nanosatellite 25 an ni. Satellite 31-te rih zawng hi kg 1323 a ni.

Cartosat hi remote sensing satellite niin, panchromatic leh multi-spectral camera hmanga thuam a ni a, kum nga dam tur a ni.

Nikum February thla khan ISRO hian a ṭum khatah satellite 104 kapchhuakin, record a lo siam tawh a, kum 2014-a Russia-in ṭum khata satellite 37 a kahchhuah chu a khum a ni. Satellite 104 a kahchhuah zinga pathum chauh hi India siam a ni thung a, a dangte hi ramdang siam niin a tam zawk hi US siam a ni.