Smart luggage ken phal tawh dawn lo

Jet Airways airline chuan himna tura hmalakna kawng khat atan January 15 aṭangin an thlawhtheihnaah non-removable batteries 'Smart Luggage' ken a phal tawh dawn lo.

Airline-in a tarlan danin he hamlakna hi International Air Transport Association (IATA) in flight safety atana dan a duan zulzuia kalpui a nih thu a sawi.

Thuchhuah siamin, 'Non-removable batteries Smart Luggage-te chu Cabin Baggage emaw, Check-in baggage ah emaw pawh ken luh phal a ni tawh lo ang' a ti. Smart Luggage nena check-in turte chu a hmain an battery uninstall vek tura tih an ni a, uninstall a nih hnuah battery chu cabin baggage bikah chuah spare battery anga ken theih a ni ang, a ti.

IATA in dan a siamah chuan Smart Luggage hian lithium batteries, motors, power banks, GPS, GSM, Bluetooth, RFID leh Wi-Fi awmna bungrua a huam a ni. Mobile phone erawh ken theih a ni ang.

Jet Airways hian an air hostess pakhat, tunhnaia Hong Kong-a US dollar, cheng vaibelchhe thum chuang hu ken luh tum an man chu a hna aṭangin a ban tawh bawk. Air hostess hi January 7 zan khan Indira Gandhi International airport-ah man a ni a, pawisa thawntu Amit pawh man a ni tawh bawk. Air hostess hian thla hnih kalta chhung khan ṭum sarih zet Hong Kong-ah hian US dollar hi a lo kensak tawh ṭhin a, a pawisa kensak aṭang hian 1% a hlawh ṭhin a ni a, pawisa hi dollar nuai 10 vel a lo kenluh sak hman a ni.