TN transport worker ten nawrh titawp

Tamil Nadu-a transport worker-ten tiam chin awm loa nawrh an huaihawt chu ni riat hnu, nimin khan an titawp ta. Nawrh tihtawp a nih vang hian bus service pawh dan pangngaia kalpui nghal a ni.

Tamil Nadu state hian January 14 hian an state-a kut pawimawh tak, Pongal festival an hmang dawn a, festival neih hmain transport worker-te hian nawrh an titawp ta a ni. State sorkar chuan festival neih dawn vang hian nimin khan school leh college chawlh a puang.

CITU hruaitu A Soundarrajan chuan Ningani zan khan Madras High Court-in hlawh chungchanga sorkar nena an inhriatthiam lohnate chinfel saktu tur a ruat avangin tiam chin awm loa nawrh an huaihawt chu tihtawp lailawk an nih thu a sawi. Hei bakah hian festival pawimawh tak hmang tura state mipute an inbuatsaih mek vang leh, nawrh vanga mipuiten harsatna tam tak an tawh avangin mipuite hmakhua ngaia tihtawp lailawk a nih thu a sawi. Tamil Nadu State Transport Corporation (TNSTC) a thawkte hian an hlawh tisang tura sorkar nena an inbiaknaah an hlawhchham avangin January 4 aṭang khan tiam chin awm loin nawrh an huaihawt a, nawrh huaihawt hi trade union 17 in an thlawp a ni.

Hnathawktute hian hlawh hi a let 2.57 a tihpun an phut a, mahse sorkar lam hian 2.44 a tihpun a remti thung a, ṭum eng emaw zat inbiakna an nei chungin an inrem thei rih lo a ni.