Covid-19 : Recovery rate-in hma sawn zel
India ramah Covid-19 hri kai enkawl dam, recovery rate-in hma a sawn zel a, nimin khan 91.18% tling tawhin hri kai mek, active case pawh 4,59,920-ah a tlahniam tawh.
Ni 55 chu a zawnin hri kai thar aiin hri kai enkawl dam an tam zawk a, Thawhlehni khan hri kai enkawl, dama chhuah tir mi 47,240 awmin hemi ni vek hian hri kai thar 43,733 an awm leh.
Ram pumah Covid-19 vaccine pek chhuah runpui kalpui mek a ni bawk a, vaccine hi mi 36,13,23,548 in an la tawh a ni. State pariat - Uttar Pradesh, Madhya Pradesh, Rajasthan, Tamil Nadu, Bihar, Gujarat, Karnataka leh Maharashtra-te chuan kum 18-44 inkar mi nuai 50 chuang hnenah vaccine dose khatna an pe tawh.
Andhra Pradesh, Assam, Chhattisgarh, Delhi, Haryana, Jharkhand, Kerala, Telangana, Himachal Pradesh, Odisha, Punjab, Uttarakhand leh West Bengal-ah pawh kum 18-44 inkar mi nuai 10 chuangten vaccine hi an la tawh bawk.
Vaccine dose hnih lakin Covid vanga thihna lakah 95% in veng thei : ICMR
Covid-19 vaccine dose hnih lakin Covid vanga thihna lakah 95% in min veng thei a, dose khat lakin 82% in min veng thei tih Indian Council of Medical Research (ICMR) zirchianna thar ber chuan a tarlang.
Indian Journal of Medical Research (IJMR)-a tihchhuah, he zirchianna hi Tamil Nadu police department mi leh sa, Covid-19 vaccine dose khatna la tawh leh vaccine la la lo mi 1,17,524 hnen aṭangin neih a ni.
"Kan zirchianna aṭangin Covid-19 vaccine dose khatna emaw tal la tawh te chuan hri vanga thihna hi an pumpelh thei tih kan hrechhuak. Huam zau zawka Covid-19 vaccine kan semchhuah hi a pawimawh a, eng vaccine pawh ni se Covid-19 hri leng thar a lo awm palh pawha mitthi kan tlem theih nan a pawimawh a ni," tiin researcher-te chuan an sawi.
Tamil Nadu Police department hian an member vaccine la tawh te chu uluk taka an hriselna dinhmun te chhinchhiahin, Covid-19 hri leng thawh hnihna chhunga mitthi zat te, damdawi-ina an luh hun leh vaccine an lak hun thlengin an chhinchhiah sak a ni.