Calcutta High Court-in CM Banerjee Rs nuai 5 chawi tir

Calcutta High Court judge Kaushik Chanda chuan nimin khan West Bengal chief minister Mamata Banerjee chu cheng nuai nga a chawi tir.

Judge Kaushik Chanda hi CM Banerjee-i'n assembly inthlan hnuhnung bera a dinna, Nandigram biala BJP candidate Suvendu Adhikari thlan tlin a nih chungchanga petition a thehluh ngaihtuahtu a ni a, mahse nimin khan he thubuai ngaituahtu a aṭangin a bang a ni. CM hian a hmain judge nen hian inhmuhthiam lohna an lo neih tawh avangin bang turin a lo ngen tawh a ni.

Case a chhuahsan thu a sawi hmain judge Chanda chuan CM chu judge hming tihchhiatna tur lo ruahman lawk vek leh, constitution duty bawhchhiaah a puh. "Dan kalphung zawm duh lo a, tawngkam mawi lo leh rilru thlenga midang tihnat a tumna avangin petition thehluttu hi Rs nuai nga chawi tir a ni," tiin thupek a tihchhuah a tarlang.

Mamata Banerjee hian a petitition thehluh ngaihtuahtu, judge Chanda chu BJP nena inzawmna nei nia puhin ṭan bik nei turah a puh a, hei vang hian court hranah thubuai hi sawn turin a duh tih a sawi a ni. A ngaihtuahtu tur berin a chhuahsan tak avangin acting chief justice Rajesh Bindal chuan judge dang a ruat leh a ni.

Nanidgram bialah hian Election Commission chuan a tirah Banerjee hi chak zawk angin a puang a, mahse a hnuah result hi siamṭhain Adhikari hi chak zawkah puan a ni leh ta a ni.