CJI leh SC judge-te Buaina ching fel turin ngen

Supreme Court-a judge pali-te chu Chief Justice of India Dipak Misra lakah helin, CJI chu thubuai a sem danah thil ti dik tawk lo niin an puh. Mahse Supreme Court Bar Association (SCBA) leh Bar Council of India (BCI) chuan judge-te chu judiciary zahawmna humhim tura an inhriatthiam lohna neihte chingfel thuai turin an ngen.

Supreme Court senior judge pali - Justice J Chelameswar, Ranjan Gogoi, Madan Lokur leh Kurian Joseph-te chuan kar kalta Zirtawpni khan Supreme Court inrelbawl dan chu a dik tawk lo niin an sawi a, court inrelbawl dan hi siamṭhat a, a zahawmna humhim a nih loh chuan india ramah democracy a dingchang thei tawh dawn lo niin an sawi a ni. Press meet an neihnaah senior judge pali-te hian CJI Misra chu an thu thlen te ngai pawimawh loah an puh a, Misra hnuaiah hian thla reilote chhungin thil duhawm lo tak tak a thleng niin an sawi.

Senior judge leh Chief Justice-te inkara inhriatthiam lohna awm chungchang chinfel a nih theih nan Bar Council of India chuan judge-te meeting neihpui a, an harsatna te sawipui a tum. Hemi atan hian member 7 awmna team a siam nghal a ni.

Sorkar laipui chuan he buaina chungchangah hian inrawlh a tum loh thu sawiin, judiciary lamin pawn lam mi tel loin an chingfel tur niin a sawi. Hetihlai hian Congress chuan Prime Minister Narendra Modi-a thawhpui Nripendra chu CJI chenna in kawtah hmuh a nih thu an sawi thung. Mahse Misra chuan CJI hi mimal thila hmuh tum a nih thu leh, a hmuh theih loh thu a sawi bawk.