J&K sorkarin Army chief thusawi sawisel

Jammu and Kashmir sorkar chuan Indian Army Chief Genral Bipin Rawat chu an state chhung school-a inzirtir dan a sawi chungchangah sawiselin, sipai hotu chu a huang chin pel lo turin a ti.

General Rawat hian J&K-a school-te chuan map pahnih - India leh Jammu & Kashmir map an zirtir a, hei hian zirlaite rilruah inthliarna nasa tak a siam niin a sawi. Sipai hotu thusawi hian social media lamah sawi zui a hlawh hle a, ram chhunga state tinah map pahnih, India map leh state map zirtir an ni vek niin an chhang let a ni.

State education minister Altaf Bukhari chuan, "Army chief dinhmun hi ramchhungah dinhmun zahawm leh chawimawina a ni a, sipai hotu pawh hi mithiam a ni a, a thiamna hi kan ringhlel lo. Mahse zirna chungchanga zirtirna pe tur chuan educationist chu ani lo a ni", a ti. Academician ni lo hnen aṭanga education chungchanga sermon dawn chu eng society mahin an pawm theih a rin bik loh thu a sawi.

Bukhari chuan education chu state subject a ni a, state sorkar chuan an state education system enkawl dan chu a thiam tawk a ni, a ti. J&K chuan special status a nih angin state constitution hran a nei a, state dangte pawhin map hran an nei ve vek tih a sawi bawk. State tina school-ah state map zir a ni vek tih sawiin, sipaite chuan an hna dik tak a thawk a nih chuan inlakhran duhna a awm lo ang, a ti.