UN-a vote vangin kan inlaichinna a danglam phah lo : Israel PM

Israel Prime Minister Benjamin Netanyahu chuan ni ruk cham turin Pathianni khan India a rawn thleng.

Israel PM chuan United Nations-a US-in Israel khawpui atana Jerusalem a puan chungchanga vote laknaah, a duh lo lamah India chuan vote thlak mah se, he vote hian ram pahnihte inlaichinna a tihdanglam phah dawn lo tih a sawi.

Benjamin Netanyahu hi Israel PM zinga India ram rawn tlawhtu pahnihna a ni a, kum 2003 khan Ariel Sharon a lo zin tawh bawk. Nikum khan Prime Minister Narendra Modi chuan Israel hi a lo tlawh tawh bawk a, India PM zinga Israel tlawh hmasa ber a ni.

Nimin chawhma dar 10.30 khan Netanyahu lawmna inkhawm hi Rashtrapati Bhavan-ah buatsaih a ni a, hemi hnu hian Raj Ghat-ah MK Gandhi thlanah zahna a hlan a ni. Nimin vek khan priem minister pahnihte chu Hyderabad House-ah an inkawm zui a ni. Tlai lamah 2nd India-Israel CEO Forum leh India-Israel Business Summit-ah an tel leh bawk.

India rama Netanyahu a cham chhung hian Israel leh India thawhdunna thuthlung eng emaw zat ziah beisei a ni. Israel PM chuan India rama a zin hian ram pahnihte thawhdunna a tihchak ngei a beisei thu a sawi. Hetih rual hian Israel khawpui atana Jerusalem duh lo lama India-in vote a thlak chu pawi an tih hle a, mahse vote khat chauh hian ram pahnihte inlaichinna thuk tak neih tawh chu a tihdanglam phah lo a ni, a ti.

Prime Minister Narendra Modi chu hruaitu ropui tak a ni tia fakin, India ram mipuite tan theihtawp chhuahtu a ni, a ti.