J&K-ah JeM firfiak panga kap hlum

India rama pawikhawina thlen tura Jasmmu and Kashmir, Baramulla district-a rawn luh tum, Pakistan firfiak pawl Jaish-e-Mohammad (JeM) mi leh sa panga chu kahhlum an ni.

Director general of state police Sp Vaid chuan firfiakte hi Kashmir hmar lam ramri, Uri-a Dulanja khuaah kahhlum an nih thu a sawi. Vaid chuan firfiak dangte zawngin state police, Indian army leh central armed police force-te chuan beihpui an thlak nghal tih a sawi bawk. Kum thar hma ni chiah khan South Kashmir-a Central Reserve Police Force (CRPF) camp chu firfiakten luhkhungin, sipaite nen an inkahnaah sipai panga leh firfiak pathum an thi a ni. JeM chuan camp beitu an nih thu an sawi. Hei bakah hian January 6-a Sopore khuaa Improvised Explosive Device (IED) puak vanga police pali thihna thleng pawh an tih niin an sawi bawk.

Indian Army chief General Bipin Rawat chuan Pakistan chu India rama firfiakte rawn luhruk tir tum foah a puh a, mahse India sipaite chuan a ṭhenawm ram thil tum hi a lo dang thei zel a ni, a ti. Pakistan sipaite chuan J&K-a ramri, Line of Control (LoC) kaltlanga India rama firfiak rawn luh tumte chu an pui ṭhin a ni, a ti. Hetianga an tichhunzawm zel a nih chuan India chuan na zawkin a bei let dawn tih a sawi bawk.