Bihar CM car beitua puh mi 28 man

Bihar Chief Minister Nitish Kumar-a car leh a zuitu motor-te chu Buxar district-ah mi ṭhenkhatin lungin an tawng a, he thil thleng kaihhnawihah hian mi 28 man a ni tawh.

CM hian state pum huapa Vikas Samiskha Yatra a neih peng pakhatah, ni hnih kalta khan Dumraon block-a Nandan thingtlang khua a tlawh a, hemi ṭum hian a motor leh amah zuitu motor dangte chu lungin an lo tawng a ni. CM hi an vawm fuh lo a, mahse secuirty guard ṭhenkhat chuan hliam an tuar a, motor ṭhenkhat pawh an vawm chhe bawk.

Buxar SP Rakesh Kumar chuan he thil thleng kaihhnawihahhian FIR panga ziahluh a nih thu leh, mi 28 man an ni tawh thu a sawi. An mante hi mipa 18 leh hmeichhe 10 an ni. He thil thleng chungchang hi chhui zui mek a ni tih a sawi bawk.