India leh Israel-in inremna pakua ziak

India leh Israel chuan Thawhṭanni khan thawhdunna tur inremna thuthlung pakua an ziak. Inremna an ziah zingah hian cyber security bakah oil leh gas lama thawhdunna turte a tel a ni.

India rama cham mek, Israel Prime Minister Benjamin Netanyahu leh Prime Minister Narendra Modi-te kaihhruaiin ram pahnih aiawhte chu Thawhṭanni khan inkawmin, thawhdunna tur hi ziah nghal a ni. Oil and gas sector lama thawhdunna tur hi Ministry of Petroleum and Natural gas leh Isarel Ministry of Energy-ten an ziak a ni.

Air transport agreement siamṭhat pawh siam nghal a ni a, hei bakah ram pahnihte hian film-co-production lama thawhdunna tur pawh an ziak bawk. Homeopathic medicine research lama thawhdunna turin Central Council for Research in Homeopathy, Ministry of AYUSH leh Centre for Integrative Complementary Medicine, Shaare Zedek Medical Centre of Israel-te chuan MoU an ziak bawk.

Space lama thawhduna tur chu Indian Institute of Space Science and Technology (IIST) leh Technion- Israel Institute of Technology-ten an ziak a, solar thermal technology-a thawkdun turin Indian Oil leh Israel Yeda Research and Development Co Ltd-ten inremna an ziak bawk a ni.

Israel PM hi ni ruk cham turin Pathianni khan India a rawn thleng a, official 130 zetin an rawn zui a ni. A cham chhung hian Agra, Ahmedabad leh Mumbai-te a tlawh ang. Netanyahu hi Israel PM zingah kum 15 hnua India rawn tlawh leh hmasa ber a ni.

Nimin khan Netanyahu hian Agra a tlawh a, Uttar Pradesh Chief Minister Yogi Adityanath chuan Kheria airbase-ah a lo hmuak a, heta aṭang hian Taj Mahal lam an pan nghal a ni. Netanyahu hi PM Modi-an a ṭawiawm a ni. Taj Mahal an tlawh hnuah UP CM hian chaw chhun a kilpui a, hemi hnu hian Netanyahu hi Delhi-ah kir lehin Raisina Dialogue hawngin thu a sawi nghal a ni.

Vawiinah-ah Netanyahu hian Ahmedabad panin Sabarmati Ashram pawh a tlawh dawn a, International Centre for Entrepre-neurship and Technology (iCreate) hun hmanah a telpui ang.