Eirua puh Jammu & Kasmir minister-in ban a inhuam

Jammu and Kashmir rural development minister Abdul Haq Khan chuan Congress MLA pakhatin centrally-sponsored scheme kalpuinaah sum eirua a puhna chu thu dik lo a nih thu sawiin, a eiru tih a finfiah theih chuan minister a nihna aṭanga ban nghal a inhuam thu a sawi.

Nimina Assembly inkhawmah Congrss MLA Banihal Vikar Rasool chuan MGNREGA scheme kalpui danah thil dik tawk lo a awm niin a sawi a ni. Minister chuan hei hi chhangin, eirua puhna chu a finfiahna a awm chuan a ban tur thu a sawi. Congress MLA hi minister-in a chhan danah lungawi loin, House aṭangin a chhuak zui nghal a ni.

House pawn lama chanchinthar lakhawmtute a kawmnaah, Rasool chuan a thusawi chu thu dik tak a nih thu a sawi. A bial chhungah kum hnih kalta aṭang khan MNGREGA hnuaia sum pek tur cheng vaibelchhe kua chu tihkhawtlai sak mek a ni tih sawiin, hetihlai hian MGNREGA chuan hnathawktute chu ni 15 chhung ngeia an hlawh pe turin a ti thung a ni, a ti.

Rural development scheme-a thil dik tawk lo awm chu chhui chiang turin a phut a, mahse sorkar chuan a thusawi chu a ngaihven sak duh lo a, inphenna tur dang a zawng zawk a ni, a ti. State sorkar chu he scheme hi tichhiaah a puh a, siamṭhat a nih loh chuan hmasawnna engmah a awm lo ang, tiin a sawi.