Chief Justice of India-in bench a siamah judge hel pali tel lo

Chief Justice of India Dipak Misra-an thubuai pawimawh zual bik buaipuitu tura a din, consitution bench-ah tunhnaia CJI laka hel, judge senior pali-te telh an ni lo.

Supreme Court senior judge pali–Jasti Chelameswar, Ranjan Gogoi, MB Lokur leh Kurian Joseph-te chuan kar hmasa khan press conference koin, Chief Justice rorel dan hi na takin an sawisel a, thubuai a sem danahte a fel tawk lo niin an sawi. Heng judge pali-te hi Chief Justice tih lohah chuan ram chhunga judge senior berte an ni.

CJI-in constitution bench a siamah hian member panga an awm a, Chief Justice bakah Justice AK Sikri, AM Khanwilkar, DY Chandrachud leh Ashok Bhushan-te chu member atan ruat an ni. Heng judge-te hian vawiin aṭang hian thubuai pawimawh zual–Aadhaar chungchang, homosexuality khap leh khap loh chungchang, Sabarimala temple-a hmeichhiate luh khap leh MLA/MP-te chu thubuai an neihah thiam loh chantir an nih hmain disqualify nghal tur an ni em tih chungchangte an ngaihtuah ṭan dawn a ni.

Chief Justice leh Supreme Court senior judge-te inkara harsatna awm hi chinfel a la ni lo a, mahse Attorney General K K Venugopal chuan ni nih thum hnuah buaina hi chinfel beisei a nih thu a sawi. Judge pali-te pawh hian Thawhṭanni khan Supreme Court-ah an hna chu dan pangngaiin an thawk chhunzawm leh nghal a ni.