PM Modi leh Netanyahu-ten roadshow nei

India rama cham mek, Israel Prime Minister Benjamin Netanyahu leh Prime Minister Narendra Modi-te chuan nimin khan Ahmedabad, Gujarat-ah roadshow a nei.

Hruaitu pahnihte hian nimin chawhma dar 10.20 khan Ahmedabad hi thlengin, airport aṭanga Sabarmati Ashram inkar, km riat-a thuiah roadshow hi an nei a ni. Kum sawm chuang zet Mahatma Gandhi lo chen tawhna, Sabarmati Ashram, Gandhi Ashram tia sawi bawk chu tlawhin, Gandhi zahna an hlan a, hemi hnu hian Baval city-a iCreate centre leh, Sabarkantha-a agriculture centre an tlawh nghal a ni. Sabarmati Ashram-a visitors book-ah Netanyahu leh a nupui, Sara-te chuan thu an ziak a ni.

Roadshow neihna, km riat-a thuiah hian venhimna khauh taka kalpui a ni a, kawngpui dungah state 50 siamin, state hrang hrangten cultural programme an nei bawk a ni. Venhimna hna thawk tur hian Israel sniper-te bakah, Chetak Commando team 12, Quick Response Team, Bomb Detection and Disposal Squad bakah Gujarat Police-te dah an ni. Hei bakah hian kawng dunga in chhawng sangah special squad dah an ni bawk a, Sabarmati luiah speedboat hmangin security force-te an duty reng bawk.

Roadshow neih dawn vang hian an kawng zawhna pawhtu kawngpui dangte chu khar an ni. Netanyahu hian Ahmedabad aṭang hian Mumbai a pan leh ang.

Israel PM hi PM Modi-an a homestate, Gujarat-a ram dang hruaitu lu ber a thlen pathumna a ni. Nikum September thla khan Japan PM Shinzo Abe leh Modi-te hian Ahmedabad-ah hian roadshow an lo nei tawh bawk a, Abe leh a nupui hian Mahatma Gandhi-a chenna ṭhin, Sabarmati Ashram hi an tlawh a ni. Kum 2014 khan China President Xi Jinping leh a npui chuan Gujarat hi an lo tlawh tawh bawk.