Kutdawh awm lohna Telangana siam tum

Telangana Chief Minister K Chandrasekhar Rao-a kaihhruai chuan an state chu kutdawh awm lohna state-a siam tumin hma a la mek.

Kutdawh awm lohna state siam tura an hmalakna kawng khat atan, state Prisons Department chuan ruahmanna thar a siam a, an state khawpui Hyderabad-a kutdawh hmu a, official hnena hriattir te hnenah lawmman Rs 500 zel pek a tiam.

Telangana State Prisons Department (TSPD) chuan thuchhuah siamin, an state pum, a bikin Hyderabad khawpui chu kutdawh awm lohna hmunah siam an tum tih a sawi. Kutdawh hmute hnenah lawmman pek a tiamna thuchhuah a siam hnuah hian mi pariat chuan kutdawh an hmuhte chu official hnenah report-in lawmman an la tawh a, heng kutdawhte hi department staff-te kutah hlan an ni bawk.

TSPD Inspector General A Narsimha chuan kum 2017, October 28 aṭang khan kutdawhte awmna tur hmun hi an siam thu a sawi, Chanchalguda-ah mipa awmna tur bik siamin, hmeichhe awmna tur chu Charlapalli-ah siam a nih thu a sawi. Heng hmun siam a nih aṭanga thla thum chhungin hmun hrang hrang aṭangin kutdawh sanghnih vel an lakkhawm thu a sawi. Kutdawh an hruaikhawmte hi an dinhmun dik takte chhui chian a nih hnuah an zinga a tam zawk chu an in lamah hawn tir leh an ni a, kut an dawh nawn leh chuan jail-a dahin, thubuai siamsak an nih tur thute hrilh an ni.

Ahmedabad khawpuia kutdawh thenfai hna hi nikum October thlaa Global Entrepreneurship Summit (GES) an thlen dawn aṭang khan neih ṭan a ni. GES-ah hian ram hrang hrang aṭanign palai ṭhahnem tak an tel a, an zingah hian US President Donald Trump-a advisor leh fanu, Ivanka Trump pawh a tel.