Ramdang khualzin rawn lut an pung

Kum 2017 chhung khan India ramah ramdang khualzin rawn kal zat chu makduai 10 an tling a, khualzinte aṭanga sum lakluh hi dollar tluklehdingawn 27 chuang a tling a ni.

Tourism sector chuan kuminah pawh khualzin tam zawk an lo luh leh theih nan project thar leh ṭha zawk duan dan a ngaihtuah mek a ni. Union tourism minister KJ Alphons chuan, "Kan sector hian kan ti ṭha hle a, mahse kan duhtawk mai tur a ni lo. India hi hmun nuam leh ropui tak a nih avangin hei aia tam tlawhtu an awm hi ka duh a ni. Mi tam zawk hip luh tumin kan bei zel dawn a ni", a ti.

Minister chuan tourism sector-te'n India GDP-ah 6.88% zet a thawh pha tih sawiin, kum 2017-a employment figure-ah pawh 12% a thawh a ni, a ti. Sorkar laipui chuan khualzinte hipna atan hian Swadesh Darshan scheme hnuaiah infrastructure te pawh a thuam ṭhain a tichangtlung zel tih a sawi. Kum 2017-18 chhungin he scheme hnuaiah hian project pasarih siam a ni a, sakhaw hmun pawimawhte thuam changtlung a ni, a ti.

Tourism ministry chuan sorkar laipuiin hmarchhak state-a tourism sector tihchak nan Looking East policy pawh a kalpui thu a sawi bawk.