SC-in 'Padmaavat' film tihchhuah khapna hlip

Supreme Court chuan BJP sorkarna state pali-ten film sawisel hlawh tak, 'Padmaavat' film tihchhuah khapna an siam chu nimin khan a hlihsak.

Chief Justice Dipak Misra kaihhruai bench chuan Haryana, Gujarat, Madhya Pradesh leh Rajasthan sorkarten an state chhunga 'Padmaavat' film tihchhuah an khapna thupek an siam chu a 'stay' sak a ni. Bench chuan Deepika Padukone, Shahid Kapoor leh Ranveer Singh-te channa film hi Central Board of Film Certification (CBFC) in a pawmpui tawh tih sawiin, state sorkar chuan dan leh thupek lama harsatna thlen thei tih chhuanlama hmangin tihchhuah tur hi a lo dang ngawt thei lo, a ti. 

'Padmavaat' film hi kum zabi 13 hunlaia Maharaja Ratan Singh leh a sipaite leh Sultan Alluddin Khilji of Delhi-te inkara indona thleng chungchang channa a ni a, politician tam tak chuan film siam a nih dan hi an lo sawisel fo tawh a ni. Rajput hnam te chuan film-a Queen Padmavati lantir a nih dan chu na taka sawiselin, a zahawmna tibawrhbangah an puh. Film channa hmun, Jaipur leh Kolhapur ami pawh suasam a ni tawh bawk. He film tihchhuahna cinema hall-te chu halah an vau a ni. Haryana politician, Suraj Pal Amu chuan film director Bhansali leh Rani Padmani lem changtu Deepika Padukone-te lu laksaktu hnenah lawmman cheng vaibelchhe 10 pek a tiam bawk.