EC-in Delhi MLA 20 disqualify turin rawt

Election Commission chuan Delhi-a rorellai, Aam Aadmi Party MLA 20-te chuan Parliamentary Secretary-a ruat an nih chungchangah hmun dang aṭanga hlawkna la, 'office of profit' chelhah puhin MLA an nihna aṭanga ban turin rawtna a siam.

EC hian a rawtna hi President Ram Nath Kovind hnenah a thawn tawh a ni.

AAP MLA te disqualify tur hian Delhi lawyer Prashant Patel chuan PIL a thehlut a, kum 2016 June 9 khan Congress party pawhin Election Commission hnenah hian AAP MLA 21 te ban tur hian complaint a lo thehlut tawh bawk. Heng MLA 21 zinga Rajouri Garden MLA chuan nikum February thlaa Punjab Assembly inthlana chuh a tum vang khan Delhi MLA a nihna aṭang hian a lo bang tawh a ni.

EC chuan AAP MLA te hi insawifiah turin a lo ti tawh bawk. Kum 2017 khan MLA te hian EC hnenah an laka 'office of profit' chelha puhna chu titawp turin an lo ngen tawh a, mahse EC chuan an ngenna hi hnawlin, an chungthu hi ngaihtuah chhunzawm zel a nih tur thu a sawi.

Kum 2015 March thla khan AAP sorkar chuan Delhi Members of Legislative Assembly (Removal of Disqualification) Act, 1997 chu siamṭhain, Parliamentary Secretary post chu office of profit-ah a huam tel tir tawh lo a ni. Mahse he tihlaia President Pranab Mukherjee chuan a pawmpui lo a, Delhi High Court pawhin kum 2016, September thla khan he dan siamṭhat hi Lt Governor pawmpuina loa pass nia sawiin a hnawlsak bawk a ni.