India-ah Covid-19 nuai 2 chuang an awm tawh Hrikai hmuh chhuah tam ber ni a thleng leh

India ramah hripui kai hmuh chhuah tam ber ni a thleng leh a, mi 8,909-in an kai tih nimin khan hmuh chhuah leh niin hrileng hian ziaawm lam a la pan lo hle.

India ram pumah hri kai nuai hnih chuang an awm tawh bawk a, mi 2,07,615-in an kai tawh a ni. Enkawl dam zat nasa takin pung ve bawk mah se hrileng kai thar pawh hi hmuhchhuah thar zat aṭang hian an la tlahniam loin ziaawm lam kan la pan dawn lo hle niin a lang.

Nimina Ministry of Health and Family Welfare report aṭanga a lan dan chuan enkawl dam mi 1,00,303 an awm tawh a, enkawl dam zat pawh hi an pung hle a, nimin aṭang hian nuai an chuang chiah a ni. Hetih lai hian hrikai mek zat pawhin nuai an chuang ve tho bawk a, mi 1,01,497-in an kai mek bawk. Covid-19 vanga thi mi 5,815 an awm tawh bawk a ni. 

Nimina MoHFW report tihchhuah hma darkar 24 chhungin mi 4,776 chu enkawl dam an ni a, hetihlai hian 8,909 laiin an kai tih hmuh chhuah thar a ni ve leh bawk. Thihpui mi 217 an awm belh a ni. Enkawl dam rate hi 48.07% a ni mek bawk.

Hrileng kai tam ber state Maharashtra-ah chuan mi 72,300-in an kai tawh a, kai hmuh chhuah thar 2,287 awmin enkawl dam 31,333 an awm a, kai mek 38, 502 an awm. Thihzat hian ziaawm lam an pan hret hret dawn nia a lan laiin nimin report-ah chuan an pung leh a, ni eng emaw zat 100 an kai tawh loh laiin 103-in an thihpui leh a ni. Maharashtra-ah hian mi 2,465-in an thihpui tawh.

Tamil Nadu-ah chuan mi 24,586-in kai tawhin mi 1,091 laiin an kai belh leh. Enkawl dam tawh hi an tam zawk a, mi 13,706 chu enkawl dam tawhin mi 10,683-in an la kai mek a ni, Tamil-ah hian mi 197-in an thihpui tawh a, mi 13-in an thih belh leh a ni.

Delhi-ah pawh mi 22,132 laiin kai tawhin Tamil aiin case thar a tam zawk a, 1,298 a awm. Enkawl dam 9,243 awm tawhin mi 12,333-in an la kai mek a, thihpui 556 lai an awm tawh.