Union cabinet thar meeting hmasa berah Covid response package Rs vbc 23,123 pawm

Prime minister Narendra Modi-a'n a cabinet a siksawi leh a tihlen hnua union cabinet thar meeting hmasa berah, ram chhunga Covid-19 hri leng mek dona atan cheng vaibelchhe 23,123 an pawm.

Ningani cabinet-in emergency response package a pawm hi hripui a len hnuah sorkar laipuiin Covid-19 package a siam ṭum hnihna a ni. Kum 2020, April thla khan package hmasa zawk, Rs vcb 15,000 chu a lo siam tawh bawk. Hemi hmang hian ram chhung hmun hrang hrangah Covid-dedicated hospital leh health centre-te siam an lo ni tawh a ni.

Union health minister thar Mansukh Mandivya chuan Covid hri leng thawh hnihna thlengin harsatna a thlente siamṭhatna tur leh, health infrastructure thuam chakna turin sorkar chuan chhawmdawlna package hi a siam a ni, a ti.

Covid-19 package siam thar hmang hian ram chhunga district 736-ah paediatrics department siam a ni dawn a, damdawi-in ward khum 2,40,000 leh ICU khum 20,000 siam tharin, damdawi pawh ṭhahnem tak lei khawl a ni ang, tiin Health Minister chuan a sawi. District tinah oxygen litre 10,000 chin dahṭhat theihna tur facility leh oxygen leh damdawi dahkhawlna tur, storage facility-te siam a nih tur thu a sawi.

Minister chuan Covid package, Rs vbc 23,233 aṭangin Rs vbc 15,000 vel chu sorkar laipui hman tur a ni a, state leh UT-te hnenah Rs vbc 8,000 chu an mamawh dan azirin sem a ni ang, a ti. He ruahmanna hi thla kua chhungin hman a ni dawn tih a sawi bawk.

Hri leng mekah sorkar laipui chuan state tinte chu a theihtawpa puih zel a tum tih Mandivya chuan a sawi.