PM Modi hoin oxygen dinhmun sawiho

Prime minister Narendra Modi hoin minin khan high-level meeting neih a ni a, ram chhunga medical oxygen siam chhuah zat leh mamawh dante an sawiho.

Covid-19 hri leng thawh hnihna hluar lai khan ram chhung hmun hrang hrangah hri kai, dam lo enkawlna tur medical oxygen indaih lohna a nasa hle a, a bikin Delhi khawpui chuan harsatna hi an tuar nasa bik a ni. Mi thiamte'n hri leng hi a thawh thumna thleng leh thei reng a ni tih an sawi avangin, PM ho hian oxygen supply dinhmun hi an sawiho a ni.

Official-te chuan PM hnenah hian ram chhunga PSA oxygen plant 1500 siam thar a nih dante an hrilh a, PM CARES Fund hmanga PSA oxygen plant siamte hian oxygenated bed nuai 4 chuang an chawm thei dawn tih an sawi.

PM pawhin official-te hnena oxygen plant-te chu hman theih tura a rang thei anga peihfel tura chahin, state sorkarte chu thawhpui a, theihtawp chhuahpui turin a ti. Local leh national level-ah heng oxygen plant-te hnathawhte chhuizuina tur technology, IoT chu hmang turin a ti bawk a ni. Official-te pawhin IoT hmang hian oxygen plant-te hnathawh dan enchhinna hi neih mek a ni tih an hrilh.