Sept aṭangin kum 12-18 inkar tan Zydus vaccine lak theih dawn

September thla aṭangin kum 12 - 18 inkar tan Zydus vaccine a lak theih dawn a, emergency-a hman turin an peih thuai dawn tih National Expert Group on Vaccine Administration hotu Dr NK Arora chuan a sawi.

"Covaxin phase 3 trial chu neih mek a ni bawk a, September thla tawp vel aṭang chuan kan pekchhuah hman kan ring. Nakkum January-February lamah chuan kum 2-18 inkar tan kan pek theih tawh kan ring, " tiin Arora chuan a sawi. Mahse kum 12 - 18 inkar te chuan Zydus vaccine hi chumi hma chuan an la thei dawn tih a sawi a ni.

Arora chuan school hawn leh zirna chung­changte chu uluk takin an ngaihtuah mek tih a sawi. Mi thiamte chuan hri leng thawh thumna hian kum naupang lamah nghawng a nei na dawn nia sawiin, hei vang hian chak zawka vaccine semchhuah chu hmalakna hmasa a nih tur thu an sawi.

Hetih lai hian Pae­diatric Association leh mi thiam tam tak chuan he rinlawkna hi a dik lo ve thei tho nia sawiin, naupangte chuan hri an do hneh thei dawn tih an sawi a. Mahse sorkar laipui chuan thil pawi zawk a thlen lohna atana lo inbuatsaih lawk chu a tum tho tih a sawi a ni.