India-ah Covid-19 kai thar 43,393 awm belh leh : Nilaini aiin Covid-19 kai thar 5.4% in tlahniam

India ramah Ningani khan Covid-19 kai thar 43,393 awm belh lehin, Nilaini ai khan hri kai hi 5.4% in an tlahniam. Hri kai mek 4,58,727 an awm.

Nitina hri kai hmuhchhuah, daily positivity rate chu 2.42% niin, ni 18 chhung 3% hnuailamah awm tawhin, hri kai dam tawh, recovery rate chu 97.19% a tling tawh bawk.

Ningani khan hri vangin mi 911 an thih belh leh a, rampumah hri kaihhnawih vanga thi mi 4,05,939 an awm tawh.

Kerala chu Ningania hri kai hmuhchhuah tam berna state a ni leh. Hetih lai hian sorkar laipuiin hri kai la pun zualna state-te dinhmun zirchiang tura a tirh, expert team chuan Kerala sorkarin hri leng a hmachhawn dan chu a lungawi thlak an tih thu an sawi.

Maharashtra chu hri kai hmuh chhuah tam berna state a la ni zel a, Kerala, Karnataka leh Tamil Nadu te'n an dawt a ni.

India rama COVID-19 positivity rate 10% chunglam awmna district zinga 64% chu hmarchhak biala state pariat an ni tih Health Ministry chuan a sawi. Arunachal Pradesh-ah chuan positivity rate 10% aia a sanna hi district 18 awmin, state hrang hrang zingah hri kai rate sanna district tamna ber a ni.